बाला - 2

गुलाबी थंडीच्या
मऊशा उन्हात
कोण ही बाला
छत्रीच्या छायेत?

कवळून आळस
गाठला कळस
चालली नाजूका
सावलीच्या मायेत
कोण ही बाला
छत्रीच्या छायेत?

जगाचा विसर
चालही सरसर
कुठल्या तालात
कुणाला माहीत!
कोण ही बाला
छत्रीच्या छायेत?

पायघोळ झगा
दावितो फुगा
भासे चित्र
ते जलरंगात
कोण ही बाला
छत्रीच्या छायेत?


- संदीप चांदणे (14/8/14)

ते तेरा

तेराही ते भक्तीत न्हाले 
शिवशंभोच्या शरणी गेले
कपाळी त्रिशूळाचा टिळा
मुखी बम बम भोले!

तेराही ते जरा न भ्याले
मस्त झाले, रिचवून प्याले
सरसर चढूनी त्या चढणीवर
'नागफणी' ती तुडवून आले!

तेराही ते हरखून गेले
निसर्गापुढे नत झाले
सह्याद्रीला भरून श्वासात
घाटमाथ्यावर धुंद नाचले!

- संदीप भानुदास चांदणे (रविवार, १०/०८/२०१४)

विरह

नाजूक हास-या कळ्या, हरवले चांदणे माझे
बुडून बसले काळोखात विरहाचे क्षण माझे

स्वप्नांचाही गुंफता येईना, गोफ, डोळे मिटून
विचारात जागते माझी, रात्र, कूस बदलून

उधळीन तुझ्या वाटेवर, जे तुला हवे
येशील का सांग, तू श्रावण सरींसवे?

- संदीप चांदणे (5/8/2014)