एक पैंजणाचा पाय

रूणझुणती चांदणी
गुणगुणती पहाट
पुरवेच्या आभाळास
आता सुर्व्याचीच वाट

नीज सोडून चालली
रात घाबरीघुबरी
वळूनिया पाही मागे
जाग आली दारोदारी

जणू सूर सतारीचे
घुमती चारीठाय
पडे अंगणी सड्याच्या
एक पैंजणाचा पाय

- संदीप चांदणे (मंगळवार, १२/०२/१९)

नजर

नजर नजरेला मिळेना
तिच्या मनातले कळेना...||धृ||

लहरी वाऱ्यावर लहरे

आवरेना स्वतःला

कसे सावरावे कुणी

घोर इथे या जीवाला

घोर इथे या जीवाला

तिच्या पदराला कळेना...||१||

रेखीव, वळणदार, नाजूक

घोटीव, जीवघेणे झाले

रंगलो अंतरंगी पुरता

काळीज बरबटून गेले

काळीज बरबटून गेले

तिच्या काजळास कळेना...||२||

हरवली मखमालीची

चाहूल तिची मोरपिशी

वणवणता दिन गेला

रात्र ही जाईल कशी?

चित्त कानी साकळले

चित्त कानी साकळले
तिच्या पैंजणास कळेना...||३||

- संदीप चांदणे (१०/०९/२०१८)

ह्या असल्या पाऊसरात्री

ह्या असल्या पाऊसरात्री
मी नीज लोटूनी देतो
आठवांच्या मऊ उशीला
हलकेच कुशीत घेतो

रात्र कशी सरावी?
या अवघड प्रश्नामध्ये
नाव मनाची सोडून
हेलकावे बघत बसतो

प्रौढ जलधारांच्या
सुरात चालती गप्पा
मी त्यांच्या मैफिलीला
पहिल्या रांगेत बसतो

किती नाही म्हणावे
मी हळवा उगाच होतो
तुझे गाणे तुझ्यासाठी
माझ्याही नकळत गुणगुणतो

- संदीप चांदणे (शुक्रवार, २/८/१९)

तिची ओलेती केसं

तिच्या ओलेत्या केसांनो

माझं धडधडे काळीज

मन भुलूनिया गेलं

भल्या सकाळीच आज

नका करू शिडकावा

गार थेंबाचा निथळून

माझ्या अंगातून सारं 

अवसान गेलया गळून

कसं लावू लक्ष आता

दिवसभर मी कामात

बिन मोगऱ्याची वेणी

माझ्या गंधाळली मनात

सावरून बटा साऱ्या 

दिसतील छान खूप

पण मनी झिरपले

त्यांचे ओलेते स्वरूप

- संदीप चांदणे (२०/१२/२०१९ - २३/०५/२०२४)

प्रेम नव्हे

ते प्रेम नव्हे

येई अनुभवाते मिटून लोचनाते
पारखून घ्यावे ते प्रेम नव्हे!

मुकी साद देऊन, अंतरी डोकावते

पाहून तोंड फिरवावे ते प्रेम नव्हे!

फुलविते जिणे, कुणाचे असणे

खोटे हसू दाखवावे ते प्रेम नव्हे!

मुक्त उधळावे, रिते रिते व्हावे

रडून भांडून घ्यावे ते प्रेम नव्हे!

- संदीप भानुदास चांदणे (२०/१२/२०१९)

हा संभ्रम माझा

नकळत ओढून नेतो
मिचकावत सोडून देतो
स्वतःशीच खिन्न हसतो
हा संभ्रम माझा

स्वप्नांच्या झुळूकी मनाला
तप्त पाऊलवाटा पायाला
अनवाणी चालू पाहतो
हा संभ्रम माझा

अवखळ विचारांच्या वाऱ्यात
दात-ओठांच्या माऱ्यात
क्षणासाठी मलम होतो
हा संभ्रम माझा

- संदीप चांदणे (शनिवार, २/२/२०१९)

चाप ढिल्ले होईस्तोवर

येडे चाळे करणाऱ्यांना
हानतो आम्ही सुजस्तोवर
मित्रांना मात्र हसवतो
चाप ढिल्ले होईस्तोवर

घरचं-दारचं, बायकोचं
टेन्शन कामाचं, ऑफिसचं
विसरायला लावतो हसवून
चाप ढिल्ले होईस्तोवर

पैसा पैसा किती करणार
एकटे एकटे किती झुरणार
या हसा आमच्यासोबत
चाप ढिल्ले होईस्तोवर

- संदीप चांदणे (शनिवार, २/२/२०१९)