दुसरा

ना जेता
विजयी होउन
दुसरा तो
जाई विसरून

पाणी जाणत
रक्त सांडले
अंतरी साहस
ना उणे मोजिले

पाय रोविला
जोवर भूवरी
नसे विश्रांती
विरोधी उरी

नियतीचा पासा
जरा पलटता
होई उन्माद
अन् अतिरेकता

कुणा मनी ना
लक्ष्मणाचा त्याग
द्वेषाचा बळी
वालीचा राग

अर्जुनाच्यामागे
कर्ण मानी
सिंहासम शिवा
शंभू-छावा जनी

इतिहास थकला
वर्तमान सांगे
भविष्याच्या मनी
पहिल्याचे दंगे

ह्रद्ये जिंकली
लाखो जरी
मुकुट साजे
एकाच्या शिरी

सरोवर सुंदर
पहिल्याच्या माथी
वेदना दुस-याच्या
लाटा होती

पहिला शोभेना
दुसरा नसता
सत्य हेच
कसे विसरता?

जो तळपतो
तोही ढळेल
नवा उगवल्याचे
पुन्हा कळेल!

इथे किती
लढले - पडले
काळाने ना
कुणा गणले

तुम्ही आम्ही
मोजतो ओळी
लावून चष्मा
विसरून टाळी

मुळात हवी
टाळी खेळाला
राखेतून उठणा-या
फिनीक्सपणाला!

- संदीप चांदणे (23/6/14)

लावणी

वर्ण सावळा, मध्यम बांधा
नार दिसे तू नख-याची
मनात ठसे रूप तुझे ग
रती भासे तू मदनाची!

लढण्याआधी पडती सारे
असा तुझ्या नजरेचा वार
तुझ्यापुढे ग गुलाम सारे
राणी तू ग हुकुमाची!

भरदिवसा ना दिसते तू
चंद्र जसा तो नभी नसे
तुला पहाण्या रात्र पुरेना
लाली खुणावते पूर्वेची!

शंकाच आहे!

मेल्यावर मी तिच्या डोळ्यातून
एक तरी थेंब सांडेल? शंकाच आहे!
मी मेलोय हे तरी
निदान तिला कळेल? शंकाच आहे!

एक दिवस ठरवून
तिच्यासमोर मन ओतले
बोललो सारे-सारे
तिनेही ऐकून घेतले
पण तिला कळाले? शंकाच आहे!

गेली वा-याच्या झुळुकीसारखी
वादळ मागे ठेउन
झुंजतो मी त्याच्यासवे
रोज तिला आठवून
गेली तशीच परतेल? शंकाच आहे!

धडपडलो नाही तिला
विसरून जाण्यासाठी
ना फार प्रयत्नात आहे
तिला लक्षात ठेवण्यासाठी
तिच्या मनाच्या कोप-यात मी...? शंकाच आहे!

आता रडतो कधी
कधी तर हसतोही
उदासवाणा बसतो कधी
तिच्या आठवणीत गुरफटतोही
तिच्याकडे हे घडेल? शंकाच आहे!

विसरली माझ्याकडे ती
रुमाल मलमली तिचा
बोचतो हाती घेताच
आठवातला स्पर्श तिचा
माझे तिच्याकडे काही असेल? शंकाच आहे!

डाव मोडला मांडण्याआधी
मनोरा ढासळला रचण्याआधी
नवीन डाव मांडू?
नवीन मनोरा रचू?
मांडला जाईल? रचला जाईल? शंकाच आहे!

- संदीप चांदणे (1/6/14)