येशील येशील येशील राणी पहाटे पहाटे येशील या सुरेल मराठी गीताचे हे विडंबन आहे!मूळ कवी, संगीतकार,गायक-गायिका ज्यांनी या गाण्याला चिरतरूण सौंदर्य बहाल केलेलं आहे त्या सर्वांची माफी मागून हे विडंबन रसिकांपुढे ठेवीत आहे!
(मूळ गीताचे शब्द, जालावर सापडलेले वेगळे आणि गाण्यात वेगळेच असे दिसल्याने गाण्याची ही युट्यूबची लिंक देत आहे. मूळ गाणे आधी ऐकून आल्यास विडंबनाची खुमारी आधिकच वाढेल असे सुचवतो. किंवा कदाचित विडंबनाचा पचकाही होऊ शकतो. पण तो धोका पत्करण्यास मी तयार आहे, कारण, शेवटी वर्जिनल ते वर्जिनलच!)
येशील येशील येशील दोस्ता
पहाटे पहाटे येशील
माझिया पिण्याचे झालेले ते बिल
लगेच येऊन देशील!
होऊनी मी धीट, घेतली 'निट'
आणि हसे झाले भाऊ
तुझ्या खांद्यावर जरा टेकता
नको ना रागाने पाहू
(घरी)चल वजन पेलत-रस्त्याने झुलत
जरी तू विटून जाशील!
धुंद व्हिस्कीचा आणि स्कॉचचा
लाभला सुगंधी पेला
झाला तू कावरा, कारे बावरा?
धरलास वर तो अबोला?
उठण्यात-'बसण्यात', खाण्यात-'पिण्यात'
सदैव कंपनी देशील!
म्यानेजराचे तांडव, तूही जरा सांडव
तुझ्या खिशातल्या नोटे
तूच रे उदार, तुझाच आधार
तुझ्यात 'भरत' भेटे
सुरेच्या पुरात, नशील्या सुरात
तू माझा 'किशोर'(कुमार) होशील!
- संदीप चांदणे (१०/३/२०१६)
No comments:
Post a Comment