माझी काळोखाची कविता

मी न चाहता उगवतीचा

येईल त्याला जातो सादर

पसरूनि अंगावरती घेतो 

अंधाराची काळी चादर

मोहक तिरिपा उजेडाच्या

मृगजळ फसवे तिथेच होई

त्याहूनी प्रिय, मजला घेणे 

बरबटून काळोखाची शाई

नव्या दिसाचे समर नवे

सोबत गाणी आरवतेची

हलके घाव देते भरूनि

तमात शांती नीरवतेची

जर का आहे प्रकाश जीवन

नवसृजनाची नांदी काळोख

गूढ गहिरे व्योम आणिक

अज्ञाताचा प्रवास काळोख

- संदीप भानुदास चांदणे (१२/०५/२०२०)